नागमती चितउर-पथ हेरा । पिउ जो गए पुनि कीन्ह न फेरा ॥
नागर काहु नारि बस परा । तेइ मोर पिउ मोसौं हरा ॥
सुआ काल होइ लेइगा पीऊ । पिउ नहिं जात, जात बरु जीऊ ॥
भएउ नरायन बावन करा । राज करत राजा बलि छरा ॥
करन पास लीन्हेउ कै छंदू । बिप्र रूप धरि झिलमिल इंदू ॥
मानत भोग गोपिचंद भोगी । लेइ अपसवा जलंधर जोगी ॥
लेइगा कृस्नहि गरुड़ अलोपी । कठिन बिछोह, जियहिं किमि गोपी?॥
सारस जोरी कौन हरि, मारि बियाधा लीन्ह? ।
झुरि झुरि पींजर हौं भई , बिरह काल मोहि दीन्ह ॥1॥
(पथ हेरा=रास्ता देखती है, नागर=नायक, बावँन करा=
वामन रूप, छरा=छला, करन=राजा कर्ण, छंदू=
छल-छंदू, धूर्त्तता, झिलमिल=कवच (सीकड़ों का),
अपसवा=चल दिया, पींजर=पंजर,ठटरी)
पिउ-बियोग अस बाउर जीऊ । पपिहा निति बोलै `पिउ पीऊ’ ॥
अधिक काम दाधै सो रामा । हरि लेइ सुबा गएउ पिउ नामा ॥
बिरह बान तस लाग न डोली । रकत पसीज, भींजि गइ चोली ॥
सूखा हिया, हार भा भारी । हरे हरे प्रान तजहिं सब नारी ॥
खन एक आव पेट महँ! साँसा । खनहिं जाइ जिउ, होइ निरासा ॥
पवन डोलावहिं, सीचहिं चोला । पहर एक समुजहिं मुख-बोला ॥
प्रान पयान होत को राखा? । को सुनाव पीतम कै भाखा?॥
आजि जो मारै बिरह कै, आगि उठै तेहि लागि
हंस जो रहा सरीर मह, पाँख जरा, गा भागि ॥2॥
(बाउर=बावला, हरे हरे=धीरे धीरे, नारी=नाड़ी, चोला=शरीर,
पहर, एक…बोला=इतना अस्पष्ट बोल निकालता है कि
मतलब समझने में पहरों लग जाते हैं, हंस=हंस और जीव)
पाट-महादेइ! हिये न हारू । समुझि जीऊ, चित चेतु सँभारू ॥
भौंर कँवल सँग होइ मेरावा । सँवरि नेह मालति पहँ आवा ॥
पपिहै स्वाती सौं जस प्रीती । टेकु पियास; बाँधु मन थीती ॥
धरतहिं जैस गगन सौं नेहा । पलटि आव बरषा ऋतु मेहा ॥
पुनि बसंत ऋतु आव नबेली । सो रस, सो मधुकर, सो बेली ॥
जिनि अस जीव करसि तू बारी । यह तरिबर पुनि उठिहि सँवारी ॥
दिन दस बिनु जल सूखि बिधंसा । पुनि सोई सरवर, सोइ हंसा ॥
मिलहिं जो बिछुरे साजन, अंकस भेंटि अहंत ।
तपनि मृगसिरा जे सहैं, ते अद्रा पलुहंत ॥3॥
(पाट महादेव=पट्ट महादेवी,पटरानी, मेरावा=मिलाप, टेकु
पियास=प्यास सह, बाँधु मन थीती=मन में स्थिरता बाँध,
जिनि=मत, पलुहंत=पल्लवित होते हैं,पनपते हैं)
चढ़ा असाढ़, गगन घन गाजा । साजा बिरह दुंद दल बाजा ॥
धूम, साम, धीरे घन धाए । सेत धजा बग-पाँति देखाए ॥
खड़ग-बीजु चमकै चहुँ ओरा । बुंद-बान बरसहिं घन घोरा ॥
ओनई घटा आइ चहुँ फेरी । कंत! उबारु मदन हौं घेरी ॥
दादुर मोर कोकिला, पीऊ । गिरै बीजु, घट रहै न जीऊ ॥
पुष्प नखत सिर ऊपर आवा । हौं बिनु नाह, मँदिर को छाँवा?॥
अद्रा लाग, लागि भुइँ लेई । मोहिं बिनु पिउ को आदर देई?॥
जिन्ह घर कंता ते सुखी, तिन्ह गारौ औ गर्ब ।
कंत पियारा बाहिरै, हम सुख भूला सर्ब ॥4॥
(गाजा=गरजा, धूम=धूमले रंग के, धौरे=धवल,सफेद,
ओनई=झुकी, लेई लागि=खेतों में लेवा लगा,खेत पानी
से भर गए, गारौ=गौरव,अभिमान)
सावन बरस मेह अति पानी । भरनि परी, हौं बिरह झुरानी ॥
लाग पुनरबसु पीउ न देखा । भइ बाउरि , कहँ कंत सरेखा ॥
रकत कै आँसु परहिं भुइँ टूटी । रेंगि चली जस बीरबहूटी ॥
सखिन्ह रचा पिउ संग हिंडोला । हरियारि भूमि, कुसुंभी चोला ॥
हिय हिंडोल अस डोलै मोरा । बिरह झुलाइ देइ झकझोरा ॥
बाट असूझ अथाह गँभीरी । जिउ बाउर, भा फिरै भँभीरी ॥
जग जल बूड़ जहाँ लगि ताकी । मोरि नाव खेवक बिनु थाकी ॥
परबत समुद, अगम बिच, बीहड़ घन बनढाँख ।
किमि कै भेंटौं कंत तुम्ह? ना मोहि पाँव न पाँख ॥5॥
(मेह=मेघ, भरनि परी=खेतों में भरनी लगी, सरेख=चतुर,
भँभीरी=एक प्रकार का पतिंगा जो संध्या के समय बरसात
में आकाश में उड़ता दिखाई पड़ता है)
भा भादों दूभर अति भारी । कैसे भौंर रैनि अँधियारी ॥
मंदिर सून पिउ अनतै बसा । सेज नागिनी फिरि फिरि डसा ॥
रहौं अकेलि गहे एक पाटी । नैन पसारि मरौं हिय फाटी ॥
चमक बीजु, घन गरजि तरासा । बिरह काल होइ जीउ गरासा ॥
बरसै मघा झकोरि झकोरि । मोर दुइ नैन चुवैं जस ओरी ॥
धनि सूखै भरे भादौं माहाँ । अबहुँ न आएन्हि सीचेन्हि नाहाँ ॥
पुरबा लाग भूमि जल पूरी । आक जवास भई तस झूरी ॥
थल जल भरे अपूर सब, धरनि गगन मिलि एक ।
जनि जोबन अवगाह महँ दे बूड़त ,पिउ! टेक ॥6॥
(दूभर=भारी कठिन, भरौं=काटूँ,बिताऊँ, अनतै=अन्यत्र,
तरासा=डराता है, ओरी=ओलती, पुरबा=एक नक्षत्र)
लाग कुवार, नीर जग घटा । अबहूँ आउ, कंत! तन लटा ॥
तोहि देखे, पिउ! पलुहै कया । उतरा चीतु, बहुरि करु मया ॥
चित्रा मित्र मीन कर आवा । पपिहा पीउ पुकारत पावा ॥
उआ अगस्त, हरित-घन गाजा । तुरय पलानि चढ़े रन राजा ॥
स्वाति-बूँद चातक मुख परे । समुद सीप मोती सब भरे ॥
सरवर सँवरि हंस चलि आए । सारस कुरलहिं, खँजन देखाए ॥
भा परगास, काँस बन फूले । कंत न फिरे, बिदेसहि भूले ॥
बिरह-हस्ति तन सालै, घाय करै चित चूर ।
वेगि आइ, पिउ! बाजहु, गाजहु होइ सदूर ॥7॥
(लटा=शिथिल हुआ, पलुहै=पनपती है, उतरा चीतु=चित्त
से उतरी या भूली बात ध्यान में ला, चित्रा=एक नक्षत्र,
तुरय=घोड़ा, पलानि=जीन कसकर, घाय=घाव, बाजु=लड़ो,
गाजहु=गरजो, सदूर=शार्दूल,सिंह)
कातिक सरद-चंद उजियारी । जग सीतल, हौं बिरहै जारी ॥
चौदह करा चाँद परगासा । जनहुँ जरैं सब धरति अकासा ॥
तम मन सेज करै अगिदाहू । सब कहँ चंद, खएउ मोहिं राहू ॥
चहूँ खंड लागै अँधियारा । जौं घर नाहीं कंत पियारा ॥
अबहूँ, निठुर! आउ एहि बारा । परब देवारी होइ संसारा ॥
सखि झूमक गावैं अँग मोरी । हौं झुरावँ, बिछुरी मोरि जोरी ॥
जेहि घर पिउ सो मनोरथ पूजा । मो कहँ बिरह, सवति दुख दूजा ॥
सखि मानैं तिउहार सब गाइ, देवारी खेलि ।
हौं का गावौं कंत बिनु, रही छार सिर मेलि ॥8॥
(झुमक=मनोरा झूमक नाम का गीत, झुरावँ=सूखती हूँ,
जनम=जीवन)
अगहन दिवस घटा, निसि बाढ़ी । दुभर रैनि, जाइ किमि गाढ़ी? ॥
अब यहि बिरह दिवस भा राती । जरौं बिरह जस दीपक बाती ॥
काँपै हिया जनावै सीऊ । तौ पै जाइ होइ सँग पीऊ ॥
घर घर चीर रचे सब काहू । मोर रूप-रँग लेइगा नाहू ॥
पलटि त बहुरा गा जो बिछोई । अबहुँ फिरै, फिरै रँग सोई ॥
वज्र-अगिनि बिरहिन हिय जारा । सुलुगि-सुलुगि दगधै होइ छारा ॥
यह दुख-दगध न जानै कंतू । जोबन जनम करै भसमंतू ॥
पिउ सौ कहेहु सँदेसड़ा, हे भौंरा! हे काग!
सो धनि बिरहै जरि मुई, तेहि क धुवाँ हम्ह लाग ॥9॥
(दूभर=भारी,कठिन, नाहू=नाथ, सो घनि विरहै …लाग=
अर्थात् वही धुआँ लगने के कारण मानों भौंरे और
कौए काले हो गए)
पूस जाड़ थर थर तन काँपा । सुरुज जाइ लंका-दिसि चाँपा ॥
बिरह बाढ़, दारुन भा सीऊ । कँपि कँपि मरौं, लेइ हरि जीऊ ॥
कंत कहाँ लागौं ओहि हियरे । पंथ अपार, सूझ नहिं नियरे ॥
सौंर सपेती आवै जूड़ी । जानहु सेज हिवंचल बूड़ी ॥
चकई निसि बिछूरे दिन मिला । हौं दिन राति बिरह कोकिला ॥
रैनि अकेलि साथ नहिं सखी । कैसे जियै बिछोही पखी ॥
बिरह सचान भएउ तन जाड़ा । जियत खाइ औ मुए न छाँड़ा ॥
रकत ढुरा माँसू गरा, हाड़ भएउ सब संख ।
धनि सारस होइ ररि मुई, पाउ समेटहि पंख ॥10॥
(लंका दिसि=दक्षिण दिशा को, चाँपा जाइ=दबा जाता
है, कोकिला=जलकर कोयल (काली) हो गई, सचान=
बाज, जाड़ा=जाड़े में, ररि मुई=रटकर मर गई,
पीउ …पंख=प्रिय आकर अब पर समेटे)
लागेउ माघ, परै अब पाला । बिरह काल भएउ जड़ काला ॥
पहल पहल तन रूई झाँपै । हहरि हहरि अधिकौ हिय काँपै॥
आइ सूर होइ तपु, रे नाहा । तोहि बिनु जाड़ न छूटै माहा ॥
एहि माह उपजै रसमूलू । तू सो भौंर, मोर जोबन फूलू ॥
नैन चुवहिं जस महवट नीरू । तोहि बिनु अंग लाग सर-चीरू ॥
टप टप बूँद परहिं जस ओला । बिरह पवन होइ मारै झोला ॥
केहि क सिंगार, कौ पहिरु पटोरा । गीउ न हार, रही होइ डोरा ॥
तुम बिनु कापै धनि हिया, तन तिनउर भा डोल ।
तेहि पर बिरह जराइ कै चहै उढ़ावा झोल ॥11॥
(जड़काला=जाड़े के मौसिम में, माहा=माघ से, महवट=
मघवट, माघ की झड़ी, चीरू=चीर, घाव, सर=बाण, झोला
मारना=बात के प्रकोप से अंग का सुन्न हो जाना, केहि
क सिंगार?=किसका श्रृंगार? कहाँ का श्रृंगार करना?
पटोरा=एक प्रकार का रेशमी कपड़ा, डोरा=क्षीण होकर
डोरे के समान पतली, तिनउर=तनके का समूह, झोल=
राख, भस्म)
फागुन पवन झकोरा बहा । चौगुन सीउ जाइ नहिं सहा ॥
तन जस पियर पात भा मोरा । तेहि पर बिरह देइ झकझोरा ॥
तरिवर झरहि झरहिं बन ढाखा । भइ ओनंत फूलि फरि साखा ॥
करहिं बनसपति हिये हुलासू । मो कहँ भा जग दून उदासू ॥
फागु करहिं सब चाँचरि जोरी । मोहि तन लाइ दीन्ह जस होरी ॥
जौ पै पीउ जरत अस पावा । जरत-मरत मोहिं रोष न आवा ॥
राति-दिवस सब यह जिउ मोरे । लगौं निहोर कंत अब तोरे ॥
यह तन जारों छार कै, कहौं कि `पवन! उड़ाव’ ।
मकु तेहि मारग उड़ि परै कंत धरै जहँ पाव ॥12॥
(ओनत=झुकी हुई, निहोर लगौं=यह शरीर तुम्हारे
निहोरे लग जाय,तुम्हारे काम आ जाय)
चैत बसंता होइ धमारी । मोहिं लेखे संसार उजारी ॥
पंचम बिरह पंच सर मारे । रकत रोइ सगरौं बन ढारै ॥
बूड़ि उठे सब तरिवर-पाता । भीजि मजीठ, टेसु बन राता ॥
बौरे आम फरैं अब लागै । अबहुँ आउ घर, कंत सभागे! ॥
सहस भाव फूलीं बनसपती । मधुकर घूमहिं सँवरि मालती ॥
मोकहँ फूल भए सब काँटे । दिस्टि परत जस लागहिं चाँटे ॥
फिर जोबन भए नारँग साखा । सुआ-बिरह अब जाइ न राखा ॥
घिरिन परेवा होइ, पिउ! आउ बेगि ,परु टूटि ।
नारि पराए हाथ है, तोह बिनु पाव न छूटि ॥13॥
(पंचम=कोकिल का स्वर या पंचम राग, सगरौं=सारे,
बूड़ि उठे …पाता=नए पत्तों में ललाई मानों रक्त में
भीगने के कारण है, घिरिन परेवा=गिरहबाज कबूतर
या कौडिल्ला पक्षी, नारि=नाड़ी,स्त्री)
भा बैसाख तपनि अति लागी । चोआ चीर चंदन भा आगि ॥
सूरुज जरत हिवंचल तअका । बिरह=बजागि सौंह रथ हाँका ॥
जरत बजागिनि करु, पिउ! छाहाँ । आइ बुझाउ, अँगारन्ह माहाँ ॥
तोहि दरसन होइ सीतल नारी । आइ आगि तें करु फुलवारी ॥
लागिउँ जरै, जरै जस भारू । फिर फिर भूंजेसि, तजेउँ न बारू ॥
सरवर-हिया घटत निति जाई । टूक-टूक होइ कै बिहराई ॥
बिहरत हिया करहु, पिउ! टेका । दीठी-दवँगरा मेरवहु एका ॥
कँवल जो मानसर बिनु जल गएउ सुखाइ ।
कवहुँ बेलि फिरि पलुहै जौ पिउ सींचै आइ ॥14॥
(हिंवचल ताका=उत्तरायण हुआ, बिरह-बजागि…हाँका=
सूर्य तो सामने से हटकर उत्तर की ओर खिसका हुआ
चलता है, उसके स्थान पर विरहाग्नि ने सीधे मेरी
ओर रथ हाँका, भारू=भाड़, सरवर-हिया ….तालों का
पानी जब सूखने लगता हथ तब पानी सूखे हुए
स्थानमें बहुत सी दरारें पड़ जाती हैं जिससे बहुत
से खाने कटे दिखाई पड़ते हैं, दवँगरा=वर्षा के
आरम्भ की झड़ी, मेरवहु एका=दरारें पड़ने के कारण
जो खंड खंड हो गए हैं उन्हें मिलाकर फिर एक
कर दो, बड़ी सुंदर उक्ति है)
जेठ जरै जग चलै लुवारा । उठहि बवंडर परहिं अँगारा ॥
बिरह गाजि हनुवंत होइ जागा । लंका-दाह करै तनु लागा ॥
चारिहु पवन झकोरे आगी । लंका दाहि पलंका लागी ॥
दहि भइ साम नदी कालिंदी । बिरह क आगि कठिन अति मंदी ॥
उठै आगि औ आवै आँधी । नैन न सूझ, मरौ दुःख-बाँधी ॥
अधजर भइउ, माँसु तनु सूखा । लागेउ बिरह काल होइ भूखा ॥
माँसु खाइ सब हाडन्ह लागै । अबहुँ आउ; आवत सुनि भागै ॥
गिरि, समुद्र, ससि, मेघ, रबि सहि न सकहिं वह आगि ।
मुहमद सती सराहिए, जरै जो अस पिउ लागि ॥15॥
(लुवार=लू, गाजि=गरज कर, पलंका=पलंग, मंदी=धीरे
धीरे जलाने वाली)
तपै लागि अब जेठ-असाढ़ी । मोहि पिउबिनु छाजनि भइ गाढ़ी ॥
तन तिनउर भा, झूरौं खरी । भइ बरखा, दुख आगरि जरी ॥
बंध नाहिं औ कंध न कोई । बात न आव कहौं का रोई?॥
साँठि नाहिं,जग बात को पूछा?। बिनु जिउ फिरै मूँज-तनु छूँछा ॥
भइ दुहेली टेक बिहूनी । थाँभ नाहि उठि सकै न थूनी ॥
बरसै मेह, चुवहिं नैनाहा । छपर छपर होइ रहि बिनु नाहा ॥
कोरौं कहाँ ठाट नव साजा?। तुम बिनु कंत न छाजन छाजा ॥
अबहूँ मया-दिस्ट करि, नाह निठुर! घर आउ ।
मँदिर उजार होत है, नव कै आई बसाउ ॥16॥
(तिनउर=तिनको का ठाट, झूरौं=सूखती हूँ, बंध=ठाट बाँधने
के लिये रस्सी, कंध न कोई=अपने ऊपर भी कोई नहीं है,
साँठि नाठि=पूँजी नष्ट हुई, मूँज तनु छूँछा=बिना बंधन
की मूँज के ऐसा शरीर, थाँम=खंभा, थूनी=लकड़ी की टेक,
छपर छपर=तराबोर, कोरौं=छाजन की ठाट में लगे बाँस
या लकड़ी, नव कै=नए सिर से)
रोइ गँवाए बारह मासा । सहस सहस दुख एक एक साँसा ॥
तिल तिल बरख बरख परि जाई । पहर पहर जुग जुग न सेराई ॥
सो नहिं आवै रूप मुरारी । जासौं पाव सोहाग सुनारी ॥
साँझ भए झुरु झुरि पथ हेरा । कौनि सो घरी करै पिउ फेरा?॥
दहि कोइला भइ कंत सनेहा । तोला माँसु रही नहिं देहा ॥
रकत न रहा, बिरह तन गरा । रती रती होइ नैनन्ह ढरा ॥
पाय लागि जोरै धनि हाथा । जारा नेह, जुड़ावहु, नाथा ॥
बरस दिवस धनि रोइ कै, हारि परी चित झंखि ।
मानुष घर घर बझि कै, बूझै निसरी पंखि ॥17॥
(सहस सहस साँस=एक एक दीर्घ निश्वास सहस्त्रों दुखों
से भरा था,फिर बारह महीने कितने दुःखों से भरे बीते होंगे,
तिल तिल….परि जाई=तिल भर समय एक एक वर्ष के
इतना पड़ जाता है, सेराई=समाप्त होता है, सोहाग=
सौभाग्य, सोहागा, सुनारी=वह स्त्री ,सुनारिन, झुरि=सूखकर)
भई पुछार, लीन्ह बनवासू । बैरिनि सवति दीन्ह चिलवाँसू ॥
होइ खर बान बिरह तनु लागा । जौ पिउ आवै उड़हि तौ कागा ॥
हारिल भई पंथ मैं सेवा । अब तहँ पठवौं कौन परेवा?॥
धौरी पंडूक कहु पिउ नाऊँ । जौं चित रोख न दूसर ठाऊँ ॥
जाहि बया होइ पिउ कँठ लवा । करै मेराव सोइ गौरवा ॥
कोइल भई पुकारति रही । महरि पुकारै `लेइ लेइ दही’
पेड़ तिलोरी औ जल हंसा । हिरदय पैठि बिरह कटनंसा ॥
जेहि पखी के निअर होइ कहै बिरह कै बात ।
सोई पंखी जाइ जरि, तरिवर होइ निपात ॥18॥
(पुछार=पूछनेवाली,मयूर, चिलवाँस=चिड़िया फँसाने का
एक फंदा, कागा=स्त्रियाँ बैठै कौवे को देखकर कहती हैं
कि `प्रिय आता हो तो उड़ जा’, हारिल=थकी हुई,एक
पक्षी, धौरी=सफेद,एक चिड़िया, पंडूक=पीली,एक चिड़िया,
चित रोख=हृदय में रोष,एक पक्षी, जाहि बया=सँदेश
लेकर जा और फिर आ, कँठलवा=गले में लगानेवाला,
गौरवा=गौरवयुक्त,बड़ा,गौरा पक्षी, दही=दधि,जलाई,
पेड़=पेड़ पर, जल=जल में, तिलोरी=तेलिया मैना,
कटनंसा=काटता और नष्ट करता है, (ख) कटनास
या नीलकंठ, निपात=पत्रहीन)
कुहुकि कुहुकि जस कोइल रोई । रकत-आँसु घुँघुची बन बोई ॥
भइ करमुखी नैन तन राती । को सेराव? बिरहा-दुख ताती ॥
जहँ जहँ ठाढ़ि होइ वनबासी । तहँ तहँ होइ घुँघुचि कै रासी ॥
बूँद बूँद महँ जानहुँ जीऊ । गुंजा गूँजि करै `पिउ पीऊ ‘॥
तेहि दुख भए परास निपाते । लोहू बुड़ि उठे होइ राते ॥
राते बिंब भीजि तेहि लोहू । परवर पाक, फाट हिय गोहूँ ॥
दैखौं जहाँ होइ सोइ राता । जहाँ सो रतन कहै को बाता? ॥
नहिं पावस ओहि देसरा:नहिं हेवंत बसंत ।
ना कोकिल न पपीहरा, जेहि सुनि आवै कंत ॥19॥
(घुँघची=गुंजा, सेराव=ठंडा करे, बिंब=बिंबाफल)
