इहाँ राज अस सेन बनाई । उहाँ साह कै भई अवाई ॥
अगिले दौरे आगे आए । पछिले पाछ कोस दस छाए ॥
साह आइ चितउर गढ़ बाजा । हस्ती सहस बीस सँग साजा ॥
ओनइ आए दूनौ दल साजे । हिंदू तुरक दुवौ रन गाजे ॥
दुवौ समुद दधि उदधि अपारा । दूनौ मेरू खिखिंद पहारा ॥
कोपि जुझार दुवौ दिसि मेले । औ हस्ती हस्ती सहुँ पेले ॥
आँकुस चमकि बीजु अस बाजहिं । गरजहिं हस्ति मेघ जनु गाजहिं ॥
धरती सरग एक भा, जूहहि ऊपर जूह ।
कोई टरै न टारे, दूनौ बज्र-समूह ॥1॥
(बाजा=पहुँचा, गाजे=गरजे, दधि=दधिसमुद्र, उदधि=पानी
का समुद्र, खिखिंद=किष्किंधा पर्वत, सहुँ=सामने, पेले=जोर
से चलाए, जूह=यूथ,दल)
हस्ती सहुँ हस्ती हठि गाजहिं । जनु परबत परबत सौं बाजहिं ॥
गरु गयंद न टारे टरहीं । टूटहिं दाँत, माथ गिरि परही ॥
परबत आइ जो परहिं तराहीं । दर महँ चाँपि खेह मिलि जाहीं ॥
कोइ हस्ती असवारहि लेहीं । सूँड समेटि पायँ तर देहीं ॥
कोइ असवार सिंघ होइ मारहिं । हनि कै मस्तक सूँड उपारहिं ॥
गरब गयंदन्ह गगन पसीजा । रुहिर चूवै धरती सब भीजा ॥
कोइ मैमंत सँभारहिं नाहीं । तब जानहिं जब गुद सिर जाहीं ॥
गगन रुहिर जस बरसै धरती बहै मिलाइ ।
सिर धर टूटि बिलाहिं तस पानी पंक बिलाइ ॥2॥
(तराहीं=नीचे, दर=दल, चाँपि=दबकर, गरब=मदजल,
गुद=सिर का गूदा, मिलाइ=धूल मिलाकर)
आठौं बज्र जुझ जस सुना । तेहि तें अधिक भएउ चौगुना ॥
बाजहिं खड़ग उठै दर आगी । भुइँ जरि चहै सरग कहँ लागी ॥
चमकहिं बीजु होइ उजियारा । जेहि सिर परै होइ दुइ फारा ॥
मेघ जो हस्ति हस्ति सहुँ गाजहिं । बीजु जो खड़ग खड़ग सौं बाजहिं ॥
बरसहिं सेल बान होइ काँदो । जस बरसै सावन औ भादों ॥
झपटहिं कोपि, परहिं तरवारी । औ गोला ओला जस भारी ॥
जूझे बीर कहौं कहँ ताईं । लेइ अछरी कैलास सिधाईं ॥
स्वामि-काज जो जूझे, सोइ गए मुख रात ।
जो भागे सत छाँडि कै मसि मुख चढ़ी परात ॥3॥
(आठौं बज्र=आठों वज्रों का, दर=दल में, फारा=फाल,टुकड़ा,
सेल=बरछे, होइ=होता है, काँदो=कीचड़, मुख रात=लाल मुख
लेकर, सुर्खरू होकर, मसि=कालिमा,स्याही, परात=भागते हुए)
भा संग्राम न भा अस काऊ । लोहे दुहुँ दिसि भए अगाऊ ॥
सीस कंध कटि कटि भुइँ परे । रुहिर सलिल होइ सायर भरे ॥
अनँद बधाव करहिं मसखावा । अब भख जनम जनम कहँ पावा ॥
चौंसठ जोगिनि खप्पर पूरा । बिग जंबुक घर बाजहिं तूरा ॥
गिद्ध चील सब माँडो छावहिं । काग कलोल करहिं औ गावहिं ॥
आजु साह हठि अनी बियाही । पाई भुगुति जैसि चित चाही ॥
जेइँ जस माँसू भखा परावा । तस तेहि कर लेइ औरन्ह खावा ॥
काहू साथ न तन गा, सकति मुए सब पोखि ।
ओछ पूर तेहि जानब, जो थिर आवत जोखि ॥4॥
(काऊ=कभी, लोहे=हथियार, अगाऊ=आगे,सामने, तूरा=तुरही,
माँडो=मंडप, अनी सेना, सकति=शक्ति भर,भरसक, पोखि=
पोषण करके, ओछ=ओछा,नीच, पूर=पूरा, जोखि आवति=
विचारता आता है, जो थिर आवत जोखि=जो ऐसे शरीर
को स्थिर समझता आता है)
चाँद न टरै सूर सौं कोपा । दूसर छत्र सौंह कै रोपा ॥
सुना साह अस भएउ समूहा । पेले सब हस्तिन्ह के जूहा ॥
आज चाँद तोर करौं निपातू । रहै न जग महँ दूसर छातू ॥
सहस करा होइ किरिन पसारा । छेंका चाँद जहाँ लगि तारा ॥
दर-लोहा दरपन भा आवा । घट घट जानहु भानु देखावा ॥
अस क्रोधित कुठार लेइ धाए । अगिनि-पहर जरत जनु आए ॥
खडंग-बीजु सब तुरुक उठाए । ओडन चाँद काल कर पाए ॥
जगमग अनी देखि कै धाइ दिस्टि तेहि लागि ।
छुए होइ जो लोहा माँझ आव तेहि आगि ॥5॥
(चाँद=राजा, सूर बादशाह, समूहा=शत्रुसेना की भीड़,
छातू=छत्र, दर लोहा=सेना के चमकते हुए हथियार,
ओडन=ढाल,रोकने की वस्तु, ओडन चाँद….पाए=
चंद्रमा के बचाव के लिये समय-विशेष (रात्रि) मिला
जब सूर्य सामने नहीं आता, जगमग=झलझलाती
हुई, जगमग ….लागि=राजा ने गढ़ पर से बादशाह
की चमकती हुई सेना को देखा, छुए….आगि=यदि
लोहा सूर्य के सामने होने से तप जाता है तो जो
उसे छुए रहता है उसके शरीर में भी गरमी आ
जाती है, अर्थात् सूर्य के समान शाह की सेना का
प्रकाश देख शस्त्रधारी राजा को जोश चढ़ आया)
सूरुज देखि चाँद मन लाजा । बिगसा कँवल, कुमुद भा राजा ॥
भलेहि चाँद बड़ होइ दिसि पाई। दिन दिनअर सहुँ कौन बड़ाई?॥
अहे जो नखत चंद सँग तपे । सूर के दिस्टि गगन महँ छपे ॥
कै चिंता राजा मन बूझा । जो होइ सरग न धरती जूझा ॥
गढ़पति उतरि लड़ै नहिं धाए । हाथ परै गढ़ हाथ पराए ॥
गढ़पति इंद्र गगन-गढ़ गाजा । दिवस न निसर रैनि कर राजा ॥
चंद रैनि रह नखतन्ह माँझा । सुरुज के सौंह न होइ, चहै साँझा ॥
देखा चंद भोर भा सूरुज के बड़ भाग ।
चाँद फिरा भा गढ़पति, सूर गगन-गढ़ लाग ॥6॥
(कँवल=बादशाह, कुमुद=कुमुद के समान संकुचित,
दिन…बड़ाई=दिन में सूर्य के सामने उसकी क्या
बड़ाई है? तपे=प्रतापयुक्त थे, जो होइ सरग..
झूझा=जो स्वर्ग (ऊँचे गढ़) पर हो वह नीचे
उतरकर युद्ध नहीं करता, हाथ परै गढ़=लूट हो
जाय गढ़ में, भा गढ़पति=किले में हो गया,
सूर्य के सामने नहीं आया)
कटक असूझ अलाउदिं-साही । आवत कोइ न सँभारै ताही ॥
उदधि-समुद जस लहरैं देखी । नयन देख, मुख जाइ न लेखी ॥
केते तजा चितउर कै घाटी । केते बजावत मिलि गए माटी ॥
केतेन्ह नितहिं देइ नव साजा । कबहुँ न साज घटै तस राजा ॥
लाख जाहिं आवहिं दुइ लाखा । फरै झरै उपनै नव साखा ॥
जो आवै गढ़ लागै सोई । थिर होइ रहै न पावै कोई ॥
उमरा मीर रहे जहँ ताईं । सबहीं बाँटि अलंगैं पाईं ॥
लाग कटक चारिहु दिसि, गढ़हि परा अगिदाहु ।
सुरुज गहन भा चाहै, चाँदहि जस राहु ॥7॥
(उदधि समुद्र=पानी का समुद्र, केतेन्ह…साजा=न जाने
कितनों को नए नए सामान देता है, तस राजा=ऐसा
बड़ा राजा वह अलाउद्दीन है, अलंगै=बाजू,सेना का
एक एक पक्ष, अगिदाह=अग्निदाह, सुरुज गहन ….
राहु=सूर्य (बादशाह)- चंद्रमा (राजा) के लिए
ग्रहण-रूप हुआ चाहता है, वह चंद्रमा (राजा) के
लिये राहु-रूपहो गया है)
अथवा दिवस, सूर भा बसा । परी रैनि, ससि उवा अकसा ॥
चाँद छत्र देइ बैठा आई । चहुँ दिसि नखत दीन्ह छिटकाई ॥
नखत अकासहि चढ़े दिपाहीं । टुटि टुटि लूक परहिं, न बुझाहीं ॥
परहिं सिला जस परै बजागी । पाहन पाहन सौं उठ आगी ॥
गोला परहिं, कोल्हु ढरकाहीं । चूर करत चारिउ दिसि जाहीं
ओनई घटा बरस झरि लाई । ओला टपकहिं, परहिं बिछाई ॥
तुरुक न मुख फेरहिं गढ़ लागे । एक मरै, दूसर होइ आगे ॥
परहिं बान राजा के, सकै को सनमुख काढ़ि ।
ओनई सेन साह कै रही भोर लगि ठाढ़ि ॥8॥
(भा बासा=अपने डेरे में टिकान हुआ, नखत=राजा के सामंत
और सैनिक, लूक=अग्नि के समान बाण, उठ=उठती है, कोल्हु=
कोल्हू, ढरकाहीं=लुढ़काए जाते हैं, सकै को…..काढ़ि=उन बाणों
के सामने सेना को कौन आगे निकाल सकता है)
भएउ बिहानु, भानु पुनि चढ़ा । सहसहु करा दिवस बिधि गढ़ा ॥
भा धावा गढ़ कीन्ह गरेरा । कोपा कटक लाग चहुँ फेरा ॥
बान करोर एक मुख छूटहिं । बाजहिं जहाँ फोंक लगि फूटहिं ॥
नखत गगन जस देखहिं घने । तस गढ़-कोटन्ह बानन्ह हने ॥
बान बेधि साही कै राखा । गढ़ भा गरुड़ फुलावा पाँखा ॥
ओहि रँग केरि कठिन है बाता । तौ पै कहै होइ मुख राता ॥
पीठि न देहिं घाव के लागे । पैग पैग भुइँ चाँपहिं आगे ॥
चारि पहर दिन जूझ भा, गढ़ न टूट तस बाँक ।
गरुअ होत पै आवै दिन दिन नाकहि नाक ॥9॥
(गरेरा=घेरा, एक मुख=एक ओर, बाजहिं=पड़ते हैं, फोंक=तीर
का पिछला छोर जिसमें पर लगे रहते हैं, बाजहिं जहाँ …फूटहि=
जहाँ पड़ते है पिछले छोर तक फट जाते हैं, ऐसे जोर से वे
चलाए जाते हैं, रँग=रण-रंग, नाक=नाका, मुख्य-स्थान)
छेंका कोट जोर अस कीन्हा । घुसि कै सरग सुरँग तिन्ह दीन्हा ॥
गरगज बाँधि कमानैं धरीं । बज्र-आगि मुख दारू भरीं ॥
हबसी रूमी और फिरंगी । बड़ बड़ गुनी और तिन्ह संगी ॥
जिन्हके गोट कोट पर जाहीं । जेहि ताकहिं चूकहिं तेहि नाहीं ॥
अस्ट धातु के गोला छूटहिं । गिरहिं पहार चून होइ फूटहिं ॥
एक बार सब छूटहिं गोला । गरजै गगन, धरति सब डोला ॥
फूटहिं कोट फूट जनु सीसा । ओदरहिं बुरुज जाहिं सब पीसा ॥
लंका-रावट जस भई, दाह परी गढ़ सोइ ।
रावन लिखा जरै कहँ, कहहु अजर किमि होइ ॥10॥
(सुरँग=सुरंग, जमीन के नीचे खोदकर बनाया हुआ मार्ग,
गरगज=परकोटे का वह बुर्ज जिसपर तोप चढ़ाई जाती है,
कमानैं=तोपें, दारू=बारूद, फिरंगी=पुर्त-गाली भारत में सबसे
पहले आए पुर्तगालियों के लिये प्रयुक्त हुआ) गोट=गोले,
ओदरहिं=ढह जाते हैं, रावट=महल, अजर=जो न जले)
राजगीर लागै गढ़ थवई । फूटै जहाँ सँवारहिं सबई ॥
बाँके पर सुठि बाँक करेहीं । रातिहि कोट चित्र कै लेहीं ॥
गाजहिं गगन चढ़ा जस मेघा । बरिसहिं बज्र, सीस को ठेला? ॥
सौ सौ मन के बरसहिं गोला । बरसहिं तुपक तीर जस ओला ॥
जानहुँ परहिं सरग हुत गाजा । फाटे धरति आइ जहँ राजा ॥
गरगज चूर चूर होइ परहीं । हस्ति घोर मानुष संघरहीं ॥
सबै कहा अब परलै आई । धरती सरग जूझ जनु लाई ॥
आठौ बज्र जुरे सब एक डुंगवै लागि ।
जगत जरै चारिउ दिसि, कैसैहि बुझै न आगि ॥11॥
(थवई=मकान बनानेवाले, चित्र=ठीक,दुरुस्त, तुपक=बंदूक,
बाजा=पड़ते हैं, धरती सरग=आकाश और पृथ्वी के बीच,
डुंगवा=टीला)
तबहूँ राजा हिये न हारा । राज-पौरि पर रचा अखारा ॥
सोह साह कै बैठक जहाँ । समुहें नाच करावै तहाँ ॥
जंत्र पखाउज औ जत बाजा । सुर मादर रबाब भल साजा ॥
बीना बेनु कमाइच गहे । बाजे अमृत तहँ गहगहे ॥
चंग उपंग नाद सुर तूरा । महुअर बंसि बाज भरपूरा ॥
हुडक बाज, डफ बाज गँभीरा । औ बाजहिं बहु झाँझ मजीरा ॥
तंत बितंत सुभर घनतारा । बाजहिं सबद होइ झनकारा ॥
जग-सिंगार मनमोहन पातुर नाचहिं पाँच ।
बादसाह गढ़ छेंका, राजा भूला नाच ॥12॥
(समुहें=सामने, मादर=मर्दल,एक प्रकार का ढोल, रबाब=
एक बाजा, कमाइच=सारंगी बजाने की कमान, उपंग=एक
बाजा, तूरा=तूर, तुरही, महुअर=सूखी तुमड़ी का बना बाजा
जिसे प्रायः सँपेरे बजाते हैं, हुडुक=डमरू की तरह का बाजा
जिसे प्रायः कहार बजाते हैं, तंत=तंत्री, घनतार=बड़ा झाँझ)
बीजानगर केर सब गुनी । करहिं अलाप जैस नहिं सुनी ॥
छवौ राग गाए सँग तारा । सगरी कटक सुनै झनकारा ॥
प्रथम राग भैरव तिन्ह कीन्हा । दूसर मालकोस पुनि लीन्हा ॥
पुनि हिंडोल राग भल गाए । मेघ मलार मेघ बरिसाए ॥
पाँचवँ सिरी राग भल किया । छठवाँ दीपक बरि उठ दिया ॥
ऊपर भए सो पातुर नाचहिं । तर भए तुरुक कमानैं खाँचहिं ॥
गढ़ माथे होइ उमरा झुमरा । तर भए देख मीर औ उमरा ॥
सुनि सुनि सीस धुनहिं सब, कर मलि मलि पछिताहिं ।
कब हम माथ चढ़हिं ओहि नैनन्ह के दुख जाहिं ॥13 ॥
(ऊपर भए; तर भए=ऊपर से; नीचे से, गढ़ माथे=किले
के सिरे पर, उमरा झुमरा=झूमर,नाच)
छवौ राग गावहिं पातुरनी । औ पुनि छत्तीसौ रागिनी ॥
औ कल्यान कान्हरा होई । राग बिहाग केदारा सोई ॥
परभाती होइ उठै बेगाला । आसावरी राग गुनमाला ॥
धनासिरी औ सूहा कीन्हा । भएउ बिलावल, मारू लीन्हा ॥
रामकली, नट, गौरी गाई । धुनि खममाच सो राग सुनाई ॥
साम गूजरी पुनि भल भाई । सारँग औ बिभास मुँह आई ॥
पुरबी, सिंधी, देस, बरारी । टोडी गोंड सौं भई निरारी ॥
सबै राग औ रागिनी सुरै अलापहि ऊँच ।
तहाँ तीर कहँ पहुँचै दिस्टि जहाँ न पहूँच?॥14॥
(पहूँच=पहुँचती है)
जहवाँ सौंह साह कै दीठी । पातुरि फिरत दीन्हि तहँ पीठी ॥
देखत साह सिंघासन गूँजा । कब लगि मिरिग चाँद तोहि भूजा ॥
छाँडहिं बान जाहिं उपराही । का तैं गरब करसि इतराही? ॥
बोलत बान लाख भए ऊँचे । कोइ कोट, कोइ पौरि पहूँचे ॥
जहाँगीर कनउज कर राजा । ओहि क बान पातुरि के लागा ॥
बाजा बान, जाँघ तस नाचा । जिउ गा सरग, परा भुइँ साँचा ॥
उडसा नाच, नचनिया मारा । रहसे तुरुक बजाइ कै तारा ॥
जो गढ़ साजै लाख दस, कोटि उठावै कोटि ।
बादशाह जब चाहै छपै न कौनिउ ओट ॥15॥
(फिरत=फिरते हुए, सिंघासन=सिंहासन पर=गूँजा=गरजा,
मिरिग=मृग अर्थात् मृगनयनी, भूजा=भोग करेगा, भए
ऊँचे=ऊपर की ओर चलाए गए, साँचा=शरीर, उडसा=
भंग हो गया, तारा=ताल, ताली)
राजै पौरि अकास चढ़ाई । परा बाँध चहुँ फेर लगाई ॥
सेतुबंध जस राघव बाँधा । परा फेर, भुइँ भार न काँधा ॥
हनुवँत होइ सब लाग गोहारू । चहुँ दिसि ढोइ ढोइ कीन्ह पहारू ॥
सेत फटिक अस लागै गढ़ा । बाँध उठाइ चहूँ गढ़ मढ़ा ॥
खँड खँड ऊपर होइ पटाऊ । चुत्र अनेक, अनेक कटाऊ ॥
सीढ़ी होति जाहिं बहु भाँती । जहाँ चढ़ै हस्तिन कै पाँती ॥
भा गरगज कस कहत न आवा । जनहुँ उठाइ गगन लेइ आवा ॥
राहु लाग जस चाँदहिं तस गढ़ लागा बाँध ।
सरब आगि अस बरि रहा, ठाँव जाइ को काँध ॥16॥
(अकास चढ़ाई=और ऊँचे पर बनवाई, चहुँ फेर लगाई=चारों
ओर लगाकर, मढ़ा=घेरा, पटाऊ=पटाव, गगन लेइ=आकाश तक,
को काँध=उस जगह जाने का भार कौन ऊपर ले सकता है?)
राजसभा सब मतै बईठी । दखि न जाइ, मूँदि गइ दीठी ॥
उठा बाँध, चहुँ दिसि गढ़ बाँधा । कीजै बेगि भार जस काँधा ॥
उपजै आगि आगि जस बोई । अब मत कोई आन नहिं होई ॥
भा तेवहार जौ चाँचरि जोरी । खेलि फाग अब लाइय होरी ॥
समदि फाग मेलिय सिर धूरी । कीन्ह जो साका चाहिय पूरी ॥
चंदन अगर मलयगिरि काढा । घर घर कीन्ह सरा रचि ठाढा ॥
जौहर कहँ साजा रनिवासू । जिन्ह सत हिये कहाँ तिन्ह आँसू?॥
पुरुषन्ह खड़ग सँभारे, चंदन खेवरे देह ।
मेहरिन्ह सेंदुर मेला, चहहिं भई जरि खेह ॥17॥
(मतै=सलाह करने के लिये, कीजै बेगि…काँधा=जैसा भारी
युद्ध आपने लिया है उसी के अनुसार कीजिए,यही सलाह
सबने दी, समदि=एक दूसरे से अंतिम बिदा लेकर, साका
कीन्ह=कीर्ति स्थापित की है, चाहिय पूरी=पूरी होनी चाहिए,
सरा=चिता, जौहर=गढ़ घिर जाने पर जब राजपूत गढ़ की
रक्षा नहीं देखते थे तब स्त्रियाँ शत्रु के हाथ में न पड़ने
पाएँ इसके लिये पहले ही से चिता तैयार रखते थे,(जब
गढ़ से निकलकर पुरुष लड़ाई में काम आ जाते थे तब
स्त्रियाँ चट चिता में कूद पड़ती थी, यही जौहर कहलाता
था) खेवरे=कौर लगाई, मेहरिन्ह=स्त्रियों, खेह=राख)
आठ बरिस गढ़ छेंका रहा । धनि सुलतान कि राजा महा ॥
आइ साह अँबराव जो लाए । फरे झरे पै गढ़ नहिं पाए ॥
जौ तोरौं तौ जौहर होई । पदमिनि हाथ चढ़ै नहिं सोई ॥
एहि बिधि ढील दीन्ह, तब ताईं । दिल्ली तै अरदासै आईं ॥
पछिउँ हरेव दीन्हि जो पीठी । सो अब चढ़ा सौंह कै दीठी ॥
जिन्ह भुइँ माथ गगन तेइ लागा । थाने उठे, आव सब भागा ॥
उहाँ साह चितउरगढ़ छावा । इहाँ देस अब होइ परावा ॥
जिन्ह जिन्ह पंथ न तृन परत, बाढ़े बेर बबूर ।
निसि अँधियारी जाइ तब बेगि उठै जौ सूर ॥18॥
(आइ साह अँवराव…पाए=बादशाह ने आकर जो आम के पेड़
लगाए वे बड़े हुए,फलकर झड़ भी गए पर गढ़ नहीं टूटा, जो
तोरौं=बादशाह कहता है कि यदि गढ़ को तोड़ता हूँ तो,
अरदासैं=अर्जदाश्त,प्रार्थनापत्र, हरेव=हेरात प्रदेश का पुराना
नाम, थान उठे=बादशाह की जो स्थान स्थान पर चौकियाँ
थी वह उठ गईं, जिन्ह….बबूर=जिन जिन रास्तों में घास
भी उगकर बाधक नहीं हो सकती थी उनमें बादशाह के
रहने से बेर और बबूल उग आए हैं)
