पदमावति पुनि पहिरि पटोरी । चली साथ पिउ के होइ जोरी ॥
सूरुज छपा, रैनि होइ गई । पूनो-ससि सो अमावस भई ॥
छोरे केस, मोति लर छूटीं । जानहुँ रैनि नखत सब टूटीं ॥
सेंदुर परा जो सीस अघारा । आगि लागि चह जग अँधियारा ॥
यही दिवस हौं चाहति, नाहा । चलौं साथ, पिउ! देइ गलबाहाँ ॥
सारस पंखि न जियै निनारे । हौं तुम्ह बिनु का जिऔं, पियारे ॥
नेवछावरि कै तन छहरावौं । छार होउँ सँग, बहुरि न आवौं ॥
दीपक प्रीति पतँग जेउँ जनम निबाह करेउँ ।
नेवछावरि चहुँ पास होइ कंठ लागि जिउ देउँ ॥1॥
(आगि लागि …अँधियार=काले बालों के बीच लाल सिंदूर
मानो यह सूचित करता था कि अँधेरे संसार में आग लगा
चाहती है, छहराऊँ=छितराऊँ)
नागमती पदमावति रानी । दुवौ महा सत सती बखानी ॥
दुवौ सवति चढ़ि खाट बईठीं । औ सिवलोक परा तिन्ह दीठी ॥
बैठौ कोइ राज औ पाटा । अंत सबै बैठे पुनि खाटा ॥
चंदन अगर काठ सर साजा । औ गति देइ चले लेइ राजा ॥
बाजन बाजहिं होइ अगूता । दुवौ कंत लेइ चाहहिं सूता ॥
एक जो बाजा भएउ बियाहू । अब दुसरे होइ ओर-निबाहू ॥
जियत जो जरै कंत के आसा । मुएँ रहसि बैठे एक पासा ॥
आजु सूर दिन अथवा, आजु रेनि ससि बूड़ ।
आजु नाचि जिउ दीजिय, आजु आगि हम्ह जूड़ ॥2॥
(महासत=सत्य में तिन्ह दीठि परा=उन्हें दिखाई पड़ा,
बैठी चाहे बैठे, खाटा=अर्थी, टिकठी, अगूता होइ=आगे
होकर, सूता चहहिं=सोना चाहती हैं, बाजा=बाजे से, ओर
निबाहू=अंत का निर्वाह, रहसि=प्रसन्न होकर, बूड़=डूबा,
हम्ह=हमें हमारे लिये, जूड़=ठंढी)
सर रचि दान पुन्नि बहु कीन्हा । सात बार फिरि भाँवरि लीन्हा ॥
एक जो भाँवरि भईं बियाही । अब दुसरे होइ गोहन जाहीं ॥
जियत, कंत! तुम हम्ह गर लाई । मुए कंठ नहिं छोडंहिं,साईं!
औ जो गाँठि, कंत! तुम्ह जोरी । आदि अंत लहि जाइ न छोरी ।
यह जग काह जो अछहि न आथी । हम तुम, नाह! दुहुँ जग साथी ॥
लेइ सर ऊपर खाट बिछाई । पौंढ़ी दुवौ कंत गर लाई ॥
लागीं कंठ आगि देइ होरी । छार भईं जरि, अंग न मोरी ॥
रातीं पिउ के नेह गइँ, सरग भएउ रतनार ।
जो रे उवा, सो अथवा; रहा न कोइ संसार ॥3॥
(सर=चिता, गोहन=साथ, हम्ह गर लाई=हमें गले लगाया,
अंत लहि=अंत तक, अछहि=है, आथी=सार;पूँजी,अस्तित्व,
अछहि न आथी,जो स्थिर या सारवान् नहीं, रतनार=लाल,
प्रेममय या आभापूर्ण)
वै सहगवन भईं जब जाई । बादसाह गड़ छेंका आई ॥
तौ लगि सो अवसर होइ बीता । भए अलोप राम औ सीता ॥
आइ साह जो सुना अखारा । होइगा राति दिवस उजियारा ॥
छार उठाइ लीन्ह एक मूठी । दीन्ह उड़ाइ, पिरथिमी झूठी ॥
सगरिउ कटक उठाई माटी । पुल बाँधा जहँ जहँ गढ़-घाटी ॥
जौ लहि ऊपर छार न परै । तौ लहि यह तिस्ना नहिं मरै ॥
भा धावा, भइ जूझ असूझा । बादल आइ पँवरि पर जूझा ॥
जौहर भइ सब इस्तरी, पुरुष भए संग्राम ।
बादसाह गढ़ चूरा, चितउर भा इसलाम ॥4॥
(सहगवन भईं=पति के साथ सहगमन किया,सती हुई, तौ
लगि…बीता=तब तक तो वहाँ सब कुछ हो चुका था, अखारा=
अखाड़े, या सभा में,दरबार में, गढ़ घाटी=गढ़ की खाईं, पुल
बाँधा…घाटी=सती स्त्रियों एक मुट्ठी राख इतनी हो गई कि
उसने जगह जगह खाईं पट गई और पुल सा बँध गया,
जौ लहि=जबतक, तिस्ना=तृष्णा, जौहर भइँ=राजपूत प्रथा
के अनुसार जल मरीं, संग्राम भए=खेत रहे, लड़कर मरे,
चितउर भा इसलाम=चित्तौरगढ़ में भी मुसलमानी
अमलदारी हो गई)
